Ofsaakstur er tilraun til manndráps

Það þarf að fara að gera eitthvað.

Á hverju ári látast 20-30 manns í umferðinni.  Það er í raun lítið mál að fækka dauðsföllum verulega, í ca. 1-2 dauðsföll á ári.  Ef við ýkjum aðeins (oft gott til að átta sig á hlutunum) og gefum okkur að enginn myndi aka hraðar en á 20 km/klst tel ég öruggt að fækkun banaslysa yrði gífurleg (svo ekki sé talað um fækkun alvarlegri slysa).  En auðvitað er enginn tilbúinn að aka á 20 km/klst til að ná þessu markmiði.  En værum við tilbúin til að færa hámarkshraða eitthvað niður?  Segjum t.d. í 70 km/klst á þjóðvegum?  Hve mörg banaslys yrðu þá?

Í dag eru íslenskir þjóðvegir ekki gerðir fyrir hraðari akstur en 90 km/klst, og reyndar vil ég nú halda því fram að hámarksakstur eigi að vera 80 km/klst.  Ég tel að sektir vegna hraðaksturs ættu að vera mun hærri.  Ef aðili er t.a.m. tekinn á 30 km/klst yfir hámarkshraða á sekt að mínu mati að vera um kr. 300.000.-  og ökutækið tekið af viðkomandi í 30 daga. 

Þessir aðilar sem voru teknir á um 180 km hraða ættu að mínu viti að fá sektir upp á kr. 900.000.- og missa ökutækið í 90 daga.

Björn Bjarnason, beittu þér í málinu !

 

Tveir teknir á yfir 180 km hraða

Herða refsingar við umferðarlagabrotum verulega

Ég verð að viðurkenna að ég er búinn að fá alveg nóg.  Í hverri einustu viku eru fréttir af fólki sem er akandi bifreiðum undir áhrifum áfengis eða annarra vímuefna.  Það virðast vera ótrúlega margir sem aka drukknir.  Í gær voru þetta m.a. fyrirsagnirnar (á fyrstu ferðahelgi ársins)

• Einn tekinn fyrir ölvunarakstur í Borgarnesi
• 5 grunaðir um ölvunarakstur (teknir af lögreglunni á höfuðborgarsvæðinu)

Ég er ekki sáttur við það að aka um vegi landsins, með konu mína og börn, og eiga það á hættu að mæta einhverjum sem er drukkinn undir stýri.  En af hverju er þetta svona?  Af hverju aka svona margir undir áhrifum?  Skortir marga svona mikið vit og þroska?  Það er kominn tími til að við gerum eitthvað í þessu aga- og virðingarleysi.

Það eina sem við Íslendingar skiljum er það sem snertir veskið.  Ég tel því að herða eigi refsingar við umferðarlagabrotum til muna og aðallega við hraðakstri og ölvunarakstur.

Það er óafsakanlegt að fólk aki drukkið.  Í slíkum tilvikum á að mínu mati að hafa fjársektir verulegar (byrja t.d. í  kr. 500.000.-) og slík brot eiga í öllum tilvikum að fela í sér upptöku á ökutækinu.  Að auki má gera þetta týpíska líkt og ökuleyfissviptingu (t.d. í 5 ár).  Þessar sektarfjárhæðir ættu að renna beint til lögreglunnar.

Ég skora á Alþingi að herða refsingar við umferðarlagabrotum verulega.  Það er með öllu óásættanlegt að þarna úti sé fólk sem ógnar mér og mínum með hátterni sínu.

Klassamunur á fréttaflutningi, fréttastofa Stöð 2 kann sig ekki.

Fréttaflutningur fjölmiðla í dag af heimsókn Friðriks og Mary til Stykkishólms hefur verið af svipuðum toga.  Undanskilið er þó fréttaflutningur Stöðvar 2.  Þar á bæ var ákveðið að fjalla sérstaklega um það þegar óþroskaður unglingur varð sér og skóla sínum til skammar með dónalegri spurningu til krónprins Danmerkur.  Spurningin var þess eðlis að hún átti líklega að vekja kátínu hjá félögum drengsins sem eru á svipuðu þroskastigi.  Spurningin til Friðriks var svohljóðandi "Hefur þú haft samkynhneigða draumóra?" (sjá fréttina hér)

Drengnum er það til vorkunnar að hann veit ekki betur, og hefur hann líklega verið að reyna að verða eitthvað í augum samnemenda sinna (sem ég vona að hafi meiri vistsmunaþroska).  Hann kann ekki mannasiði.

Það er mér hins vegar hulin ráðgáta af hverju fréttastofa Stöðvar 2 sá ástæðu til þess að birta þessa spurningu í fréttatíma sínum.  Ég hef ekki séð aðra fjölmiðla greina frá þessu atviki (og skil það vel), og ég sé ekki tilganginn með því.  Þetta er ekki frétt!  Hér var bara verið að sýna barn sem kann ekki mannasiði.

Ég geri meiri kröfur til fréttaflutnings en þetta.

Krónprinshjónin í Stykkishólmi

Hærri álagning á litaðri olíu ?

Olíugjaldið sem ríkið leggur á hvern lítra er föst krónutala eða kr. 41.-  Sú tala ræðst ekki af heimsmarkaðsverði eða gengi bandaríkjadollars.  Ofan á þessa fjárhæð kemur 24,5% virðisaukaskattur sem gerir alls 51 kr./ltr.

Þar sem eini munurinn á venjulegri gjaldskyldri olíu og gjaldfrjálsri litaðri olíu er umrætt olíugjald að viðbættum VSK þá ætti verðmunur olíunnar að vera 51 kr./ltr.

Hjá Atlantsolíu kostar lítri af venjulegri olíu 160,9 kr. en einn lítir af litaðri olíu kostar 118,9 kr.  Það er munur upp á 42 kr.  Hvar eru 9 krónurnar?  Kannski skýrir flutningskostnaður hér eitthvað (enda keyra þeir olíuna til viðskiptavinarins), en ekki 9 kr. á hvern lítra.  Skoðum annað dæmi.

Hjá Orkunni kostar lítri af venjulegri olíu 163,8 kr. en einn lítri af litaðri olíu kostar 116,8 kr.  Það er munur upp á 47 kr.  Hvar eru þessar 4 krónur?  Ekki skýrist munurinn hér af flutningskostnaði því þessar olíur er báðar til sölu á sama afgreiðslustað (Klettagörðum).

Jú eitthvað kostar litarefnið sem notað er í lituð olíuna.  Samkvæmt reglugerð skal liturinn blandast í hlutföllunum 1:10.000.  Ef það á að skýra 4 kr. á hvern lítra af olíu þá kostar þetta litarefni 40.000 kr./ltr.

Getur verið að skýringin sé einfaldlega sú að olíufélögin eru með hærri álagningu á litaða olíu? 

Olíuverð lækkar enn

Olíuverð á Íslandi ætti að lækka um 6%

Á mánudaginn var gengi bandaríkjadals 73,37 kr.  og þá kostaði olíutunnan 120 dollara.  => Tunnan kostaði kr. 8.804.-

Í dag er gengi bandaríkjadals 74,94 og olíutunnan er á 110,03 dollara.  => Tunnan kostar í dag kr. 8.245.-

Þetta er lækkun upp á 6,36% á fimm dögum.

Fyrir 5 dögum síðan kostaði lítrinn af díselolíu hjá Atlantsolíu 160,9 kr.  Í dag kostar lítrinn líka 160,9 kr.  ?

Olíugjaldið sem ríkið leggur á hvern lítra er föst krónutala eða kr. 41.-  Sú tala ræðst ekki af heimsmarkaðsverði eða gengi bandaríkjadollars. 

Eru mótmæli undanfarnar vikur ekki gagnvart röngum aðila? 

Krónan styrkist